गडचिरोली: गडचिरोलीहून उमरखेडकडे जात असलेल्या राज्य परिवहन महामंडळाच्या (ST) बसला आज भीषण अपघात झाला. मुरखळा गावाजवळ चालकाचे बसवरील नियंत्रण सुटल्याने भरधाव बस अचानक रस्त्याच्या कडेला उलटली. या भीषण अपघातात दोन प्रवाशांचा जागीच मृत्यू झाला असून सुमारे 30 प्रवासी जखमी झाल्याची प्राथमिक माहिती समोर आली आहे. अपघातानंतर परिसरात एकच खळबळ उडाली.
प्रत्यक्षदर्शींनी दिलेल्या माहितीनुसार, बसमध्ये मोठ्या संख्येने प्रवासी प्रवास करत होते. अचानक बसचा वेग अनियंत्रित झाला आणि काही क्षणांतच बस रस्त्याच्या बाजूला पलटी झाली. अपघात इतका भीषण होता की बसच्या काचा फुटल्या असून अनेक प्रवासी बसमध्ये अडकून पडले होते. अपघातानंतर नागरिकांनी तातडीने घटनास्थळी धाव घेत जखमींना बाहेर काढण्यास मदत केली.
घटनेची माहिती मिळताच पोलिस, आरोग्य विभागाचे कर्मचारी आणि आपत्कालीन पथक घटनास्थळी दाखल झाले. जखमींना तातडीने जवळच्या रुग्णालयात उपचारासाठी हलविण्यात आले असून काहींची प्रकृती गंभीर असल्याचे सांगितले जात आहे. त्यामुळे मृतांचा आकडा वाढण्याची भीती व्यक्त केली जात आहे.
दरम्यान, अपघाताचे नेमके कारण अद्याप स्पष्ट झाले नसले तरी चालकाचे नियंत्रण सुटल्यामुळे हा अपघात झाल्याची प्राथमिक माहिती समोर येत आहे. पोलिसांनी घटनास्थळी पंचनामा सुरू केला असून पुढील तपास सुरू आहे. या दुर्घटनेमुळे गडचिरोली-उमरखेड मार्गावर काही काळ वाहतूक विस्कळीत झाली होती.
