अहेरी : महाराष्ट्र आणि तेलंगणा राज्याच्या सीमेलगत असलेल्या अहेरी येथील वांगेपल्ली पुलाजवळ अवैध धंदे आणि मद्य तस्करीला आळा घालण्यासाठी पोलीस चौकी उभारण्यात आली आहे. गडचिरोली जिल्ह्याचे जिल्हा वाहतूक शाखा पोलीस अधीक्षक यांच्या मार्गदर्शना खाली तसेच अहेरी वाहतूक पोलीस स्टेशनचे सहाय्यक निरीक्षक श्री. मेश्राम यांच्या निर्देशानुसार या ठिकाणी सहा पोलीस कर्मचाऱ्यांची ड्युटी लावण्यात आली आहे. सीमावर्ती भागातून होणाऱ्या बेकायदेशीर हालचालींवर नियंत्रण ठेवणे आणि कायदा व सुव्यवस्था अबाधित राखणे, हा या उपक्रमामागील प्रमुख उद्देश आहे.
महाराष्ट्र–तेलंगणा सीमेवरील वांगेपल्ली पूल हा या भागातील महत्त्वाचा मार्ग आहे. या मार्गावरून होणारी अवैध मद्य वाहतूक तसेच इतर बेकायदेशीर व्यवहार रोखण्यासाठी पोलिसांकडून विशेष देखरेख ठेवली जाणार आहे. चौकी कार्यान्वित झाल्यामुळे सीमावर्ती भागातील संशयास्पद हालचालींवर लक्ष ठेवणे, वाहनांची तपासणी करणे आणि बेकायदेशीर व्यवहार आढळल्यास तातडीने कारवाई करणे अधिक सुलभ होणार आहे.
गडचिरोली जिल्हा पोलीस अधीक्षक यांच्या मार्गदर्शनाखाली आणि अहेरी पोलीस स्टेशनचे सहाय्यक पोलीस निरीक्षक श्री. मेश्राम यांच्या नियोजनानुसार वांगेपल्ली येथील पोलीस चौकीवर सहा कर्मचारी तैनात करण्यात आले आहे. यामध्ये संजय चक्कावार (सहाय्यक पोलीस उपनिरिक्षक), मोहन तुलावि (हवालदार), दत्तू मडेमवार (पोलीस शिपाई), विजय करमे (पोलीस शिपाई), रोहित मोहुर्ले (पोलीस शिपाई) आणि ज्ञानेश्वर नीलावार (पोलीस नाईक शिपाई) यांचा समावेश आहे. हे कर्मचारी चौकीच्या माध्यमातून परिसरातील हालचालींवर लक्ष ठेवून सीमावर्ती भागातील सुरक्षा व्यवस्था अधिक मजबूत करण्याची जबाबदारी पार पाडणार आहेत.
वांगेपल्ली पुलाजवळ पोलीस चौकी कार्यान्वित झाल्याने अवैध मद्य तस्करी आणि इतर बेकायदेशीर धंद्यांवर नियंत्रण मिळविण्यास पोलिसांना मदत होणार आहे. नियमित गस्त, वाहनांची तपासणी आणि संशयास्पद हालचालींवर देखरेख ठेवण्यावर भर दिला जाणार आहे. तसेच अल्पवयीन मुलांकडून विनापरवाना गाडी चालवणे यावर ही आळा बसणार आहे त्यामुळे सीमावर्ती भागातील कायदा व सुव्यवस्था अधिक प्रभावीपणे राखण्यास मदत होईल, अशी अपेक्षा व्यक्त होत आहे.
